മാസംതോറും സര്‍ചാര്‍ജിന് അനുമതി; വൈദ്യുതിബില്‍ കുതിക്കും
വൈദ്യുതിക്ക് മാസംതോറും സ്വമേധയാ സര്‍ചാര്‍ജ് ഈടാക്കാന്‍ വൈദ്യുതി ബോര്‍ഡിന് റെഗുലേറ്ററി കമ്മിഷന്റെ അനുമതി. കേന്ദ്രസര്‍ക്കാരിന്റെ നിര്‍ദേശമനുസരിച്ച് ഇതിനുള്ള ചട്ടങ്ങള്‍ കമ്മിഷന് അന്തിമമാക്കി. യൂണിറ്റിന് പരമാവധി 10 പൈസയാണ് ബോര്‍ഡിന് ഈടാക്കാവുന്നത്.
കരടുചട്ടങ്ങളില്‍ 20 പൈസയാണ് നിര്‍ദേശിച്ചിരുന്നത്. ബോര്‍ഡ് ആവശ്യപ്പെട്ടത് 40 പൈസയും. ഇതാണ് 10 പൈസയായി കമ്മിഷന് പരിമിതപ്പെടുത്തിയത്. ജൂണ്‍ ഒന്നിന് നിലവില്‍വരും.
വൈദ്യുതി ഉത്പാദനത്തിനുള്ള ഇന്ധനത്തിന്റെ വിലകൂടുന്നതുകാരണമുണ്ടാകുന്ന അധികച്ചെലവാണ് സര്‍ചാര്‍ജിലൂടെ ഈടാക്കുന്നത്. നിലവില്‍ മൂന്നുമാസത്തിലൊരിക്കല്‍ ബോര്‍ഡ് നല്‍കുന്ന അപേക്ഷയില്‍ ഉപഭോക്താക്കളുടെ വാദം കേട്ടശേഷമാണ് കമ്മിഷന് സര്‍ചാര്‍ജ് തീരുമാനിച്ചിരുന്നത്.
ജൂണ്‍ ഒന്നുമുതല്‍ പത്തുപൈസയില്‍ കൂടാത്ത സര്‍ചാര്‍ജ് മാസംതോറും ഈടാക്കാന്‍ ബോര്‍ഡിന് സ്വമേധയാ തീരുമാനിക്കാം. ഇത് ഉപഭോക്താവിന്റെ ഭാരം കൂട്ടും. ഇതല്ലാതെത്തന്നെ ജൂണ്‍ പകുതിയോടെ വൈദ്യുതിനിരക്ക് കൂടാനിരിക്കുകയാണ്. യൂണിറ്റിന് 41 പൈസ കൂട്ടണമെന്നാണ് ബോര്‍ഡ് ആവശ്യപ്പെട്ടത്. കമ്മിഷന് തീരുമാനമെടുത്തിട്ടില്ല.
പത്തുപൈസ നിയന്ത്രണം എല്ലായ്‌പ്പോഴും ബാധകമാവില്ല
പുതിയചട്ടം നിലവില്‍വന്നാലും പരമാവധി 10 പൈസ എന്ന നിയന്ത്രണം ആദ്യ ഒമ്പതുമാസം ബാധകമാവില്ല. പഴയചട്ടങ്ങളുടെ അടിസ്ഥാനത്തില്‍ ഒമ്പതുമാസത്തെ സര്‍ചാര്‍ജ് അനുവദിക്കാന്‍ ബോര്‍ഡ് നേരത്തേ കമ്മിഷന് അപേക്ഷ നല്‍കിയിട്ടുണ്ട്.
ആദ്യത്തെ മൂന്നുമാസം 30 പൈസയും അടുത്ത മൂന്നുമാസം 14 പൈസയും അതിനടുത്ത മൂന്നുമാസം 16 പൈസയും വേണമെന്നാണ് ബോര്‍ഡ് ആവശ്യപ്പെട്ടത്. ഈ അപേക്ഷകളില്‍ കമ്മിഷന് തീരുമാനമെടുത്തിട്ടില്ല. ചട്ടം മാറ്റിയതിനു മുമ്പുള്ള അപേക്ഷയായതിനാല്‍ പഴയചട്ടം അനുസരിച്ചുതന്നെ കമ്മിഷന് ഇത് അനുവദിക്കേണ്ടിവരും. ബോര്‍ഡ് സ്വമേധയാ ചുമത്തുന്ന പത്തുപൈസയ്‌ക്കൊപ്പം അതും ഈടാക്കും.
അതിനുശേഷം മാസം എത്രരൂപ അധികച്ചെലവുണ്ടായാലും പത്തുപൈസയേ സ്വമേധയാ ഈടാക്കാവൂ. അതില്‍ക്കൂടുതലുള്ളത് നീട്ടിവെക്കണം. ഇത് ഈടാക്കാന്‍ മൂന്നുമാസത്തിലൊരിക്കല്‍ ബോര്‍ഡിന് കമ്മിഷനെ സമീപിക്കാം. രണ്ടുമാസത്തെ ബില്‍ കാലയളവില്‍ ഓരോ മാസവും വ്യത്യസ്തനിരക്കില്‍ സര്‍ചാര്‍ജ് വന്നാല്‍ രണ്ടുമാസത്തെ ശരാശരിയാണ് ഈടാക്കുക.