ബൈത്തുല്‍ മുഖദ്ദിസ് തീര്‍ത്ഥാടനത്തിന് പോയ സംഘത്തെ കാണാനില്ലെന്ന്; പരാതി ലഭിച്ചത് ഏഴ് മലയാളികളെ കാണാതായെന്ന്; അനധികൃതമായി കടന്നുകളഞ്ഞെന്ന് സൂചനകൾ.
തീര്‍ത്ഥാടക സംഘത്തിലെ ഏഴ് പേരെ ഇസ്രായേലില്‍ കാണാതായതായി യാത്രയൊരുക്കിയ മലപ്പുറത്തെ ട്രാവല്‍ ഏജൻസി മുഖ്യമന്ത്രിക്കും ഡി.ജി.പിക്കും മലപ്പുറം എസ്.പിക്കും പരാതി നല്‍കി. ജൂലൈ 25ന് പുറപ്പെട്ട യാത്രാസംഘത്തില്‍പെട്ട രണ്ട് സ്ത്രീകള്‍ ഉള്‍പ്പെടെ ഏഴ് പേരാണ് അപ്രത്യക്ഷരായത്. ഇവര്‍ ബോധപൂര്‍വം മുങ്ങിയതാണെന്നും കണ്ടെത്താൻ സര്‍ക്കാര്‍ അടിയന്തരമായി ഇടപെടണമെന്നുമാവശ്യപ്പെട്ടാണ് പരാതി.
മലപ്പുറത്തെ ഗ്രീൻ ഒയാസിസ് ടൂര്‍സ് ആൻഡ് ട്രാവല്‍ സര്‍വീസസ് പ്രൈവറ്റ് ലിമിറ്റഡ് എന്ന സ്ഥാപനമാണ് ജോര്‍ഡൻ, ഇസ്രായേല്‍, ഈജിപ്ത് യാത്ര സംഘടിപ്പിച്ചത്. ജറുസലേമില്‍ ബൈത്തുല്‍ മുഖദ്ദിസ് സന്ദര്‍ശനത്തിനിടെയാണ് ഏഴ് പേരെ കാണാതായത്.
ഇവര്‍ അനധികൃതമായി കടന്നുകളഞ്ഞതാണെന്നാണ് സാഹചര്യത്തെളിവുകള്‍ നല്‍കുന്ന സൂചനയെന്ന് ട്രാവല്‍സ് അധികൃതര്‍ പറയുന്നു. യാത്രാസംഘത്തിലെ ബാക്കിയുള്ളവരെ ഇസ്രായേലിലെ ടൂര്‍ ഏജന്റ് തടഞ്ഞ് വെച്ചിരിക്കയാണ്. കാണാതായവരെ കണ്ടെത്തിയില്ലെങ്കില്‍ പിഴയായി ഓരോ അംഗത്തിനും 15,000 ഡോളര്‍ വീതം അടയ്ക്കണം എന്ന നിബന്ധനയാണ് ടൂര്‍ ഏജൻസി ആവശ്യപ്പെട്ടിരിക്കുന്നത്. നാളെയാണ് സംഘം ഇസ്രായേലില്‍ നിന്ന് തിരിക്കേണ്ടത്. ഹോട്ടലില്‍ നാളെ കൂടി താമസിക്കാനുള്ള അനുവാദമേയുള്ളൂ. ടൂര്‍ ഏജൻസി യാത്രാസംഘത്തെ മാനസികവും ശാരീരികവുമായി പീഡിപ്പിക്കുന്നതായി ട്രാവല്‍സ് ഉടമകള്‍ പൊലിസിന് നല്‍കിയ പരാതിയില്‍.
സുലൈമാൻ എന്നയാളാണ് കാണാതായ ഏഴ് പേര്‍ക്കും വേണ്ടി ഫെഡറല്‍ ബാങ്ക് അടൂര്‍ ശാഖയില്‍ നിന്ന് ഓണ്‍ലൈനായി പണമടച്ചത്. സുലൈമാനെ ഫോണില്‍ ബന്ധപ്പെടാൻ ശ്രമിച്ചിട്ടും ലഭ്യമാവുന്നില്ലെന്ന് ഗ്രീൻ ഒയാസിസ് ടൂര്‍സ് ആൻഡ് ട്രാവല്‍സ് മാനേജിങ് ഡയറക്ടര്‍.
കഴിഞ്ഞ മാര്‍ച്ചില്‍ സമാനമായി സംഘടിപ്പിച്ച യാത്രയില്‍ നാല് പേരെ ഇതുപോലെ കാണാതായിരുന്നു. അവരെ കണ്ടെത്താൻ നടപടി സ്വീകരിക്കണമെന്നാവശ്യപ്പെട്ട് പൊലീസിന് പരാതി നല്‍കിയിരുന്നു. ഇവരെ ഇതുവരെ കണ്ടെത്താനായിട്ടില്ല.