ഐ.സി.യുവില്‍ കുഞ്ഞുങ്ങളുടെ ചീഞ്ഞളിഞ്ഞ മൃതദേഹങ്ങള്‍... അല്‍ നാസര്‍ ആശുപത്രിയിലെ നടുക്കുന്ന ദൃശ്യങ്ങള്‍ പുറത്ത്
ഗസ്സ: ഹൃദയം തകര്‍ന്നല്ലാതെ ഈ കാഴ്ചകള്‍ നിങ്ങള്‍ക്ക് കാണാനാവില്ല. ജനിച്ച്‌ ദിവസങ്ങളും മാസങ്ങളും മാത്രം പിന്നിട്ട കുഞ്ഞുമക്കളുടെ ചീഞ്ഞളിഞ്ഞ മൃതദേഹങ്ങള്‍...
മരുന്നിന്റെ മണത്തിന് പകരം എങ്ങും മരണത്തിന്റെ മണം... മരുന്നുകുത്തി വെച്ച ഡ്രിപ്പുകളിലും കിടക്കകളിലും പുഴുവരിക്കുന്നു...
ഏതുസാഹചര്യത്തിലും ഏറ്റവും സുരക്ഷിതമെന്ന് പരിഷ്കൃത ലോകം കരുതുന്ന ഒരു ആശുപത്രി മുറിക്കുള്ളിലെ ദൃശ്യങ്ങളാണിത്. ഗസ്സയിലെ അല്‍ നാസര്‍ ആശുപത്രിയിലെ കുഞ്ഞുങ്ങളുടെ ഐ.സി.യുവിലെ നടുക്കുന്ന കാഴ്ച! നിരന്നു കിടക്കുന്ന ഐ.സി.യു കിടക്കകളില്‍ പരിചരണം കിട്ടാതെ മരിച്ച്‌ ദ്രവിച്ച അഞ്ച് പിഞ്ചോമനകളുടെ ശവശരീരങ്ങള്‍....
മൂന്നാഴ്ച മുമ്ബാണ് ഈ ആതുരാലയത്തിന് നേരെ ആക്രമണം നടത്തിയത്. രോഗികളെയും ഡോക്ടര്‍മാരെയും കൂട്ടത്തോടെ ഒഴിപ്പിച്ചിരുന്നു. എന്നാല്‍, ഐ.സി.യുവില്‍ ചികിത്സയിലുള്ള കുട്ടികളെ മാറ്റാൻ അനുവദിച്ചില്ല. ആവശ്യമായ ചികിത്സയും പരിചരണവും ലഭിക്കാതെ കുട്ടികള്‍ ഇഞ്ചിഞ്ചായി മരണത്തിന് കീഴടങ്ങി... ഹമാസിന്റെ താവളമാണെന്നാരോപിച്ചാണ് ഇസ്രായേല്‍ സേന അല്‍ നാസര്‍ ആശുപത്രി ഒഴിപ്പിച്ചത്. ആശുപത്രിക്ക് നേരെ കനത്ത ആക്രമണം അഴിച്ചുവിടുകയും ചെയ്തു.
അൽ-ജസീറ പറയുന്നതനുസരിച്ച്, ഫലസ്തീൻ ചെറുത്തുനിൽപ്പും ഇസ്രായേലും തമ്മിലുള്ള ഉടമ്പടിയുടെ നാലാം ദിവസം എമിറാത്തി ടിവി ചാനലായ അൽ-മഷ്ഹദിന്റെ റിപ്പോർട്ടർ അൽ-നാസർ കുട്ടികളുടെ ആശുപത്രിയിൽ പ്രവേശിച്ചു, ശിശുക്കളുടെ അഴുകിയ അവശിഷ്ടങ്ങൾ കണ്ടെത്തിയത്
വെടിനിര്‍ത്തലിന്റെ നാലാം ദിവസം ആശുപത്രിക്കുള്ളില്‍ കടന്ന അല്‍ മശ്ഹദ് ടി.വി ലേഖകൻ മുഹമ്മദ് ബലൂശയാണ് ഐ.സി.യു കിടക്കകളിലെ കുട്ടികളുടെ ചീഞ്ഞളിഞ്ഞ മൃതദേഹത്തിന്റെ ദൃശ്യം പുറത്തെത്തിച്ചത്. സമൂഹമാധ്യമങ്ങളിലടക്കം രൂക്ഷ വിമര്‍ശനമാണ് ഇതിനെ തുടര്‍ന്ന് ഇസ്രായേലി സേനക്കെതിരെ ഉയരുന്നത്. മനുഷ്യത്വത്തിനെതിരായ ക്രൂരകൃത്യം എന്നാണ് ഇതിനെ പലരും വിശേഷിപ്പിച്ചത്.
മൃതദേഹങ്ങള്‍ കിടക്കകളില്‍നിന്ന് നീക്കാനും ഖബറടക്കാൻ പോലും സൈന്യം അനുമതി നല്‍കിയില്ലെന്ന് ആശുപത്രി ഡയറക്ടര്‍ ഡോ. മുസ്തഫ അല്‍ കഹ്‍ലൂത് പറഞ്ഞു.
സംഭവത്തെക്കുറിച്ച് അന്വേഷിക്കാൻ ഒരു സ്വതന്ത്ര അന്താരാഷ്ട്ര സമിതി രൂപീകരിക്കണമെന്ന് ജനീവ ആസ്ഥാനമായുള്ള മനുഷ്യാവകാശ സംഘടന ആവശ്യപ്പെട്ടു.
കുട്ടികളുടെ അവസ്ഥയെക്കുറിച്ച്‌ നേരത്തേ റെഡ്ക്രോസ് അടക്കം അന്താരാഷ്ട്ര സംഘടനകള്‍ക്ക് വിവരം നല്‍കിയിരുന്നു. കുട്ടികള്‍ മരണത്തിന്റെ വക്കിലാണെന്ന് ഇസ്രായേലി സൈനിക ഓഫിസര്‍മാരെയും അറിയിച്ചു. എന്നാല്‍, പ്രതികരണം ആശാവഹമല്ലായിരുന്നു. കനത്ത ആക്രമണമാണ് ആശുപത്രിക്കുനേരെ ഇസ്രായേല്‍ സേന നടത്തിയത്. സംഭവത്തെക്കുറിച്ച് സ്വതന്ത്ര സമിതി അന്വേഷിക്കണമെന്ന് മനുഷ്യാവകാശ സംഘടനയായ യൂറോ-മെഡ് ഹ്യൂമൻറൈറ്റ്സ് മോണിറ്റര്‍ ആവശ്യപ്പെട്ടു.