നമുക്ക് നിയന്ത്രിക്കാൻ കഴിയാത്ത ഒരു സംഗതിയെക്കുറിച്ച് അമിതമായി വ്യാകുലപ്പെട്ടിട്ട് ഒരു കാര്യവുമില്ല .കാരണം അതിന്റെ നിയന്ത്രണം നമ്മുടെ പക്കലല്ല.ഇനി നമുക്ക് നിയന്ത്രിക്കാൻ കഴിയുന്ന കാര്യമാണെന്ന് കരുതുക.അവിടെ നമുക്ക് തന്നെ കാര്യങ്ങൾ ശരിയായ ദിശയിലേക്ക് തിരിച്ചുവിടാൻ കഴിയുന്നതുകൊണ്ട് വെറുതെ നമ്മൾ ടെൻഷൻ അടിക്കേണ്ട യാതൊരു കാര്യവുമില്ല.
ഒന്ന് ക്ഷമിച്ചാൽ മാത്രം പരിഹാരമാകുന്ന പല പ്രശ്നങ്ങളും ഉണ്ട് . ശാന്തതയോടെ കൈകാര്യം ചെയ്താൽ ഒത്തു തീരാവുന്ന വെല്ലുവിളികളും ഉണ്ട് . ഓരോന്നിനും അർഹിക്കുന്ന പ്രാധാന്യം നൽകുന്നതാണ് മനസ്സിന്റെ പക്വത.
ജീവിതത്തിൽ ദിനം പ്രതിയെന്നോണം പുതിയ പുതിയ വെല്ലുവിളികൾ വന്നു കൊണ്ടേയിരിക്കും.. അവയെ നാം എങ്ങനെ നേരിടണം? പ്രശ്നങ്ങളെ സംയമനത്തോടെ നേരിടുക തന്നെ വേണം .
ഏത്‌ വെല്ലുവിളികൾ ആയാലും ഒന്നുകിൽ നമുക്ക് നിയന്ത്രിക്കാൻ കഴിയുന്നതൊ അല്ലെങ്കിൽ നിയന്ത്രിക്കാൻ സാധിക്കാത്തതോ ആയിരിക്കും.
പ്രതിസന്ധികളുടെ ആഴത്തേക്കാൾ അവയോടുള്ള നമ്മുടെ സമീപനത്തിലെ അപാകതയാണ്‌ കാര്യങ്ങൾ കൂടുതൽ സങ്കീർണ്ണമാക്കുന്നത്‌.
നിയന്ത്രിക്കാൻ കഴിയാത്ത സാഹചര്യങ്ങളെക്കാൾ അപകടകരം നിയന്ത്രിക്കാൻ കഴിയാത്ത നമ്മുടെ മനസ്സാണ്‌... നിസ്സഹായനാണ്‌ എന്ന് ഉറപ്പായാൽ അവിടെ സംയമനമാണ് ഏറ്റവും ഉചിതം .
എന്നാൽ സാമാന്യ ബുദ്ധി കൊണ്ടൊ സാഹസികത കൊണ്ടൊ പ്രശ്നങ്ങളെ അതിജീവിക്കാൻ കഴിയുമെങ്കിൽ അതിനായി മുന്നിട്ടിറങ്ങാനുള്ള സന്നദ്ധതയും വേണം.