രാവിലെ എഴുന്നേറ്റ് പല്ലുതേക്കുമ്പോഴല്ലാതെ ടൂത്ത് ബ്രഷിനെ കുറിച്ച് നമ്മളില്‍ പലരും ഓര്‍ക്കാറില്ല. നാരുകള്‍ വളഞ്ഞ് ഉപയോഗിക്കാന്‍ കഴിയാത്ത അവസ്ഥ വരുമ്പോഴാണ് അതൊന്നു മാറ്റുന്നതിനെ കുറിച്ച് പോലും ചിന്തിക്കുക.
കൃത്യമായ ദന്തസംരക്ഷണം അത്യാന്താപേക്ഷിതമാണ്. ആരോഗ്യമുള്ള പല്ലുകള്‍ ശരീരത്തിന്റെ മൊത്തമുള്ള ആരോഗ്യത്തിന്റെ അടയാളമാണെന്നാണ് ആരോഗ്യവിദ്ഗര്‍ ചൂണ്ടികാണിക്കുന്നത്. അതുകൊണ്ട് തന്നെ ടൂത്ത്ബ്രഷ് തിരഞ്ഞെടുക്കുന്നതിലും ഉപയോഗിക്കുന്നതിലും കൃത്യത ഉറപ്പാക്കേണ്ടത് അത്യാവശ്യമാണ്.
മൂന്ന് മാസം കൂടുമ്പോള്‍ ടൂത്ത് ബ്രഷ് മാറ്റണമെന്നാണ് ദന്ത ഡോക്ടര്‍മാര്‍ നിര്‍ദേശിക്കാറ്. കൂടുതല്‍ കാലം ഒരേ ബ്രഷ് ഉപയോഗിക്കുന്നത് അണുബാധയ്ക്കും പല്ലു ദ്രവിക്കലിനും കാരണമാകും. കൂടാതെ ഒരുപാട് നേരം ബ്രഷ് ചെയ്യുന്നത് ബ്രഷുകളുടെ നാരുകള്‍ വളയാനും അത് മോണകളില്‍ കേടുപാടുണ്ടാക്കാനും സാധ്യതയുണ്ട്. കൂടാതെ കൂടുതല്‍ കാലം ഒരേ ബ്രഷ് ഉപയോഗിക്കുന്നത് പല്ലുകളില്‍ നിന്നും മോണകളില്‍ നിന്നും ഫലകവും ബാക്ടീരിയയും നീക്കം ചെയ്യാന്‍ ബ്രഷിന് കഴിയാതെ വരുകയും ദന്തസംബന്ധമായ പ്രശ്‌നങ്ങള്‍ ഉണ്ടാകാനുള്ള സാധ്യത വര്‍ധിക്കുകയും ചെയ്യും.
കാലപ്പഴക്കത്തില്‍ ടൂത്ത് ബ്രഷിന്റെ ബ്രിസലുകള്‍ അകന്ന് പോവുകയോ കൊഴിഞ്ഞുപോവുകയോ ചെയ്യാറുണ്ട്. ഇത് മൂലം ബ്രഷ് ചെയ്യുമ്ബോള്‍ പല്ലുകളിലെ ഭക്ഷണാവിശിഷ്ടങ്ങള്‍ നല്ല രീതിയില്‍ നീക്കം ചെയ്യാനാകാതെ വരുന്നു.
ശരിയായ സൂക്ഷിച്ചില്ലെങ്കില്‍ അതില്‍ ബാക്ടീരിയയും വളരാന്‍ സാധ്യതയുണ്ട്. പഴക്കം ചെന്ന ബ്രഷിന്റെ ഉപയോഗംമൂലം വായില്‍ അണുക്കള്‍ പെരുകി അണുബാധക്ക് കാരണമാകും. ബ്രഷിന്റെ ബ്രിസില്‍സിന് കേട് വന്നതായി ശ്രദ്ധയില്‍പ്പെട്ടാലും മാറ്റണം. കേട് വന്ന ബ്രിസല്‍സ് പല്ലുകളുടെ ഇനാമല്‍ നശിപ്പിക്കുകയും മോണയ്ക്ക് ക്ഷതമേല്‍പ്പിക്കുകയും ചെയ്യും. ഇത് മോണയില്‍നിന്ന് രക്തസ്രവത്തിനും കാരണമാകറുണ്ട്.
പുതിയ ബ്രഷ് തെരഞ്ഞെടുക്കുമ്ബോഴും ശ്രദ്ധ പുലര്‍ത്തണം. ഒരാളുടെ വ്യക്തിഗത താത്പര്യം, പ്രായം , ആരോഗ്യം ഉപയോഗത്തിന്റെ ആവൃത്തി എന്നിവയെല്ലാം ഇതില്‍ നിര്‍ണ്ണായകമാകാറുണ്ട്. നല്ല നിരയില്ലുള്ള പല്ലുകളുള്ളവര്‍ക്കും കറയടിയാത്തവര്‍ക്കും സോഫ്റ്റ് , ആള്‍ട്രാ സോഫ്റ്റ് ബ്രഷുകള്‍ ഉപയോഗിക്കാം. പല്ലില്‍ കറയുള്ളവര്‍ക്ക് മീഡിയം , ഹാര്‍ഡ് ബ്രഷ് ഉപയോഗിക്കാം.
വായുടെ ഉള്ളിലേയ്ക്കുവരെ പോയി വൃത്തിയാക്കാവുന്ന തരത്തില്‍ അല്പം ഫ്‌ളെക്‌സിബിളായ ബ്രഷ് തിരഞ്ഞെടുക്കാം. രാവിലെയും രാത്രിഭക്ഷണത്തിനുശേഷവും നിര്‍ബന്ധമായും പല്ലുകള്‍ ബ്രഷ് ചെയ്യാന്‍ ശ്രദ്ധിക്കുക.