പാമ്ബുകടിയേറ്റ് 41 കാരൻ മരിച്ച്‌ മണിക്കൂറുകള്‍ക്കു ശേഷം ധരിച്ച വസ്ത്രത്തിനുള്ളിൽ കടിച്ച പാമ്ബിനെ കണ്ടെത്തി
പാമ്ബുകടിയേറ്റ് 41 കാരൻ മരിച്ച്‌ മണിക്കൂറുകള്‍ക്കു ശേഷം കടിച്ച പാമ്ബിനെ കണ്ടെത്തി, അതും പാമ്ബുകടിയേറ്റ വ്യക്തിയുടെ വസ്ത്രത്തിനുള്ളില്‍ നിന്ന് തന്നെ !
തികച്ചും അസാധാരണമായ ഒരു സംഭവത്തിനാണ് ബിഹാറിലെ ബഗുസാരായ് പ്രദേശത്തുള്ളവർ കഴിഞ്ഞ ദിവസം സാക്ഷിയായത്.
41 കാരനായ ധർമ്മവീർ യാദവ് എന്ന വ്യക്തിയാണ് പാമ്ബിന്റെ കടിയേറ്റ് മരണപ്പെട്ടത്. തന്റെ പശുക്കള്‍ക്ക് തീറ്റ ശേഖരിക്കുന്നതിനിടെയാണ് ധർമവീറിന് പാമ്ബുകടിയേറ്റത് എന്ന് കുടുംബാംഗങ്ങള്‍ പറയുന്നു. കടിച്ചത് പാമ്ബാണെന്ന് മനസ്സിലാക്കിയ ഉടൻതന്നെ അദ്ദേഹത്തെ പ്രാദേശിക വിഷവൈദ്യന്മാരുടെ അടുത്തേക്ക് കൊണ്ടുപോയി. എന്നാല്‍ ആരോഗ്യനിലയില്‍ കൂടുതല്‍ വഷളായതോടെ ധർമ്മവീറിനെ ആശുപത്രിയിലേയ്ക്ക് മാറ്റി. പിന്നാലെ ധർമ്മവീർ മരണപ്പെടുകയായിരുന്നു.
എന്നാല്‍ കടിച്ച പാമ്ബ് ധർമ്മവീറിന്റെ വസ്ത്രത്തിനുള്ളില്‍ തന്നെ ഒളിച്ചിരിക്കുന്നുണ്ടായിരുന്നു. വിഷ വൈദ്യനടുത്തേക്കും പിന്നീട് ആശുപത്രിയിലേക്കുമുള്ള യാത്രയ്ക്കിടയില്‍ ഒരുതവണ പോലും അത് പുറത്തേക്ക് വരികയോ അനക്കമുണ്ടാക്കുകയോ ചെയ്തില്ല എന്നതാണ് അത്ഭുതപ്പെടുത്തുന്നത്.
തൊട്ടടുത്ത ദിവസം സംസ്കാരം നടത്താനായിരുന്നു കുടുംബത്തിന്റെ തീരുമാനം. മൃതദേഹം വീട്ടിലെത്തിച്ച്‌ ഒരു രാത്രി പിന്നിട്ടിട്ടും പാമ്ബ് പുറത്തേക്ക് വന്നില്ല. സംസ്കാര ചടങ്ങുകള്‍ പൂർത്തിയാക്കി ജഡം ചിതയിലേക്ക് വച്ച ശേഷം ധർമ്മവീറിന്റെ മകൻ ചിതയ്ക്ക് തീ കൊളുത്തി.
തീ ആളി പടർന്നതോടെയാണ് ധർമ്മവീറിന്റെ വസ്ത്രത്തിനുള്ളില്‍ ഒളിച്ചിരുന്ന പാമ്ബ് പുറത്തേക്ക് ചാടിയത്. ഉടൻതന്നെ പരിസരത്തുണ്ടായവർ പാമ്ബിനെ തല്ലിക്കൊല്ലുകയും ചെയ്തു. 16 മണിക്കൂറിലധികം മരണപ്പെട്ട വ്യക്തിയുടെ വസ്ത്രത്തിനുള്ളില്‍ പാമ്ബ് ഒളിച്ചിരുന്നുവെന്നത് ബന്ധുക്കളെയും പ്രദേശവാശികളെയും ഞെട്ടിച്ചു. റസല്‍ വൈപ്പർ എന്ന പേരില്‍ അറിയപ്പെടുന്ന അണലി വർഗത്തില്‍പ്പെട്ട പാമ്ബാണ് ധർമ്മവീറിനെ കടിച്ചത് എന്നാണ് പറയപ്പെടുന്നത്.