എന്നും വാർത്തകളിലിടം പിടിക്കുന്ന താരമാണ് വിദ്യാ ബാലൻ. അഭിനയപാടവം കൊണ്ടും നല്ല കഥാപാത്രങ്ങൾ ചെയ്തും പ്രേക്ഷകമനസ്സിലിടം പിടിച്ച വിദ്യാ ബാലൻ. ആരുടെയും പിൻബലമില്ലാതെ സിനിമയിലെത്തിയ വിദ്യ, പിടിച്ചുനിൽക്കാൻ ഒരുപാട് ബുദ്ധിമുട്ടിയിട്ടുണ്ട്. ഒരുപാട് കഷ്ടപ്പാടുകൾ സഹിച്ചിട്ടുണ്ട്.
ഗലാട്ട ഇന്ത്യയ്ക്ക് നല്‍കിയ അഭിമുഖത്തിലാണ് തന്റെ വെയിറ്റ് ലോസ്സ് യാത്രയെ കുറിച്ച് വിദ്യ വിശദീകരിച്ചത്. അടുത്തിടെ ഭാരം കുറച്ച്‌ മെലിഞ്ഞ് സർപ്രൈസ് ലുക്കിലെത്തി ആരാധകരെ വിദ്യ ഞെട്ടിച്ചിരുന്നു. എങ്ങനെ ഇത്ര വലിയ ട്രാൻസഫർമേഷൻ സംഭവിച്ചുവെന്ന് ആരാധകർ ഒന്നടങ്കം ചോദിക്കുകയും ചെയ്തു.
ഭാരം കുറച്ചതിനെ കുറിച്ച് വിദ്യ പറയുന്നതിങ്ങനെ, 'ജീവിതത്തിലുടനീളം വണ്ണം കുറയ്ക്കാനും മെലിയാനുമുള്ള ശ്രമത്തിലായിരുന്നു ഞാൻ. അതിനുവേണ്ടി കടുപ്പമേറിയ വർക്കൗട്ടുകളും ഡയറ്റും പിന്തുടർന്നു. ഇടയ്ക്ക് മെലിഞ്ഞെങ്കിലും പിന്നീട് വീണ്ടും വണ്ണംവെച്ചു. ഈ വർഷം ആദ്യമാണ് ചെന്നൈയില്‍ നിന്നുള്ള അമുറ എന്ന ഒരു ഗ്രൂപ്പിനെ പരിചയപ്പെട്ടത്. എന്റേത് ഇൻഫ്ളമേഷൻ ആണ് വണ്ണമല്ലെന്നാണ് അവർ പറഞ്ഞത്. ഇൻഫ്ളമേഷൻ മാറ്റാനായി എനിക്ക് യോജിക്കുന്ന രീതിയിലുള്ള ഡയറ്റും അവർ പറഞ്ഞുതന്നു. എന്റെ ശരീരത്തിന് ചേരാത്ത തരത്തിലുള്ള ഭക്ഷണമൊഴിവാക്കിയതോടെ ആ ഡയറ്റ് വളരെ മനോഹരമായി എന്റെ ശരീരത്തില്‍ പ്രവർത്തിച്ചു.
വ്യായാമം ചെയ്യുന്നത് നിർത്താനും അവർ നിർദേശിച്ചു. ഇപ്പോള്‍ കാണുന്നവരൊക്കെ എന്നോട് കുറേയധികം മെലിഞ്ഞല്ലോ എന്നാണ് പറയുന്നത്. പക്ഷെ ഈ വർഷം മുഴുവനും ഞാൻ വർക്കൗട്ടുകളൊന്നും ചെയ്തിട്ടില്ലെന്നതാണ് സത്യം. ശരീരത്തെ ജഡ്ജ് ചെയ്യുന്നത് വളരെ ക്രൂരമാണെന്നാണ് എന്റെ അഭിപ്രായം. ആളുകള്‍ പല കാരണം കൊണ്ട് വണ്ണം വെച്ചേക്കാം. അവർ മാനസികമായും ശരീരികമായും എന്തിലൂടെയാണ് കടന്നുപോവുന്നതെന്ന് നിങ്ങള്‍ക്കറിയില്ല.
വർക്കൗട്ട് നിർത്തണമെന്ന് അവർ പറഞ്ഞപ്പോല്‍ അതുകൊണ്ട് ഫലമുണ്ടാവുമോ എന്ന് എനിക്ക് പോലും സംശയമായിരുന്നു. ജിമ്മില്‍ അത്രയധികം വർക്കൗട്ട് ചെയ്യുന്ന ആളായിരുന്നു ഞാൻ. ഇപ്പോള്‍ ആളുകള്‍ എന്നെ കാണുമ്ബോള്‍ ചോദിക്കുന്നത് എങ്ങനെ ഇത് സാധിക്കുന്നു, എന്താ ചെയ്യുന്നത് എന്നാണ്. സത്യത്തില്‍ ഞാനൊന്നും ചെയ്യുന്നില്ല. ഞാൻ എല്ലാക്കാലത്തും വെജിറ്റേറിയൻ ആയിരുന്നു. പാലകും പടവലങ്ങയും എനിക്ക് ചേരില്ലെന്ന് ഞാൻ അറിഞ്ഞിരുന്നില്ല, എല്ലാ പച്ചക്കറിയും ആരോഗ്യത്തിന് നല്ലതാണെന്നാണ് ഞാൻ കരുതിയത്. പക്ഷെ അത് ശരിയല്ല, നമുക്ക് ചേരുന്നത് എന്താണെന്ന് നാം തിരിച്ചറിയണം. ഒന്ന് മറ്റൊരാള്‍ക്ക് നല്ലതാണെന്ന് കരുതി നമുക്ക് അത് ചേരണമെന്നില്ല- വിദ്യ പറയുന്നു.
എല്ലാക്കാലത്തേക്കാളും കൂടുതല്‍ ആരോഗ്യവതിയായാണ് എനിക്ക് തോന്നുന്നത്. ഞാൻ സ്വയം ആസ്വദിക്കുകയാണിപ്പോള്‍. നിങ്ങള്‍ വർക്കൗട്ട് ചെയ്യരുതെന്ന് ഞാൻ പറയുന്നില്ല, പക്ഷെ ഓരോരുത്തരും വ്യത്യസ്തരാണ്. അത് നമ്മള്‍ ബഹുമാനിക്കണം- വിദ്യ ബാലൻ കൂട്ടിച്ചേർത്തു.